На 19 септември силен земјотрес повторно го потресе Мексико. Земјотрес со јачина од 7,7 степени според Рихтеровата скала, со епицентар во Мичоакан, го потресе Мексико Сити истиот ден од годината како и другите два големи земјотреси што ги доживеа главниот град, во 1985 и 2017 година. Физичарот Хозе Луис Матеос вели дека веројатноста тоа да се повтори е 0,00000751%, додека математичарот Луис Гонзали смета дека е уште помала – 0,00000024%.
Од земјотресот на 19 септември 1985 година, со јачина од 8,1 степени, загинаа околу 10.000 луѓе, а поминаа 11.687 дена без уште еден да предизвика ниту еден смртен случај во главниот град, пишува El Pais.
Потоа, на 19 септември 2017 година, земјотрес предизвика смрт на 369 луѓе во неколку области, главно во Мексико Сити. Само пет години подоцна, уште еден земјотрес, овој пат без сериозни штети, повторно ги натера жителите на главниот град набрзина да излезат на улица.
„Веројатноста дека земјотрес ќе се случи на одреден датум е 1/365, бидејќи има 365 дена во годината, потоа помножувајќи се 1/365 со 1/365, резултатот е 1/133.225, што е проценка, под претпоставка дека еднаш годишно има земјотреси со приближна магнитуда од 7 степени“, вели Матеос.
Таа веројатност од 1/133.225 е еквивалентна на добивка на лотарија каде што има 133.225 тикети, што е 0,00000751 отсто.
Исто така, објаснува колку е веројатно тлото во Мексико повторно да се затресе на 19 септември 2023 година.
„Би било неопходно тој 1/133.225 повторно да се помножи со 1/365. Резултатот е 1/48.627.125, многу мал број“, коментира Матеос.
Така би било како да сте ја добиле првата награда на лотаријата од 48.627.125 билети – многу тешко, но не и невозможно.
