Битолската полиција ги предупредува граѓаните да внимаваат во комуникацијата со непознати лица кои им се јавуваат на телефон, зашто во последно време зачестиле измами од лица кои лажно се претставуваат.
Поради евидентирани пријави од граѓани за извршени измами од лица кои лажно се претставуваат и на различни начини ги доведуваат до заблуда оштетените со цел да остварат парична или друга корист, полицијата апелира до граѓаните да бидат претпазливи во комуникацијата со непознати лица, која е најчесто телефонска, да не наседнуваат на измами во кои лажно се нудат услуги, да ги проверуваат податоците пред да станат жртви на измама, да не им даваат пари на измамниците и сите сомнителни случаи веднаш да ги пријават на бесплатниот телефонски број 192.
Од полицијата објаснуваат дека еден од начините на измама e со телефонско јавување кај постари лица, при што ги доведуваат во заблуда со лажно прикажување дека нивни блиски предизвикале сообраќајна незгода во која е прегазено дете, а сторителот, лажно претставувајќи се како сведок или службено лице, им ветува дека за одредена сума пари може да помогне наводниот учесник во сообраќајната незгода да не оди во затвор. Притоа, измамниците ги наведуваат оштетените за кусо време да ги обезбедат бараните пари, кои ќе бидат преземени од сторителите.
Друга честа измама за која граѓаните пријавуваат е дека им се ветуваат најразлични производи или услуги како огревни дрва, лекарства, купување возила, купување станови, организации на настани, откуп на железо и друго, при што измамниците сето тоа го прават телефонски и не се појавуваат.
– Посебен апел би сакале да упатиме до повозрасните лица и до пензионерите, да внимаваат кога ги подигнуваат нивните пензии од банките и банкоматите каде има поголема фреквенција на луѓе, особено да обрнат внимание на нивното опкружување, а парите соодветно да ги чуваат во паричници и да внимаваат да не бидат предмет на измама – вечат од СВР Битола.
Полицијата евидентирала пријави од граѓани според кои измамниците се јавуваат во некој угостителски објект и претставувајќи се како овластени лица на деловни субјекти, вршат резервации на простор, притоа барајќи од угостителот дополнително да ангажира фирми за декорација или други придружни услуги, за кои потоа ќе треба да плати во готово кај одредено лице, кое подоцна, исто како и нарачателот, е недостапно за комуникација.
Дел од пријавените измами на подрачјето на СВР Битола се однесуваат и на наводен откуп на железо, при што парите се даваат најчесто на наводен такси превозник.
Измамите претставуваат кривично дело по член 247 од Кривичниот законик за кое е предвидена парична или казна затвор од три до пет, односно 10 години, зависно од големината на причинетата материјална штета.
Секторот за внатрешни работи Битола презема интензивни мерки и активности за спречување на ваквите појави и расчистување на пријавените измами.
