Стотици илјади луѓе синоќа протестираа во Израел против планираните реформи во правосудството, десетта сабота по ред. Протестите не покажуваат знаци на забавување, а во некои градови е забележан рекорден број учесници, јавуваат израелските медиуми. Си-Ен-Ен пишува дека на улиците излегле околу половина милион луѓе.
Само во Тел Авив се собраа околу 240.000 демонстранти, а во Хаифа многу помалку, околу 50.000. Протести против контроверзната реформа се одржаа и во Ерусалим, Бершеба, Еилат и неколку други градови.
Претседателот: Реформата во правосудството е грешка
Пред неколку дена, израелскиот претседател Исак Херцог за прв пат јавно проговори против плановите на десничарската влада. Тој рече дека реформата во судството е грешка, дека е репресивна и дека ги поткопува демократските основи на Израел.
Тој рече и дека е договорен компромис меѓу поддржувачите и противниците на реформата. Деталите за компромисот се уште не се познати на јавноста. Клучните елементи на реформата би можеле да поминат на последното гласање во парламентот следната недела, објавија израелските медиуми.
Со новата реформа Собранието би можело да ги укине одлуките на Врховниот суд
Според плановите на владата на премиерот Бенјамин Нетанјаху, парламентот ќе може да ги поништи одлуките на Врховниот суд со просто мнозинство. Дополнително, политичарите ќе добијат поголемо влијание врз назначувањето на судиите. Критичарите го гледаат тоа како закана за демократската поделба на власта и стравуваат дека реформите би можеле да му овозможат на Нетанјаху да избегне осуда во неговото судење за корупција.
За предлог-законот со кој ќе се ограничи можноста за негово отповикување гласаа 62 пратеници, а 20 беа против во 120-члениот парламент. Според овој нацрт, импичмент ќе биде можен само доколку за него гласаат најмалку 90 пратеници и само во случај на физичка и ментална неспособност на премиерот.
Нетанјаху: Демонстрантите ја преминаа црвената линија
На почетокот на месецот дојде до судири меѓу полицијата и демонстрантите во Тел Авив. Сообраќајот беше во прекин на повеќе патишта, а полицијата употреби водени топови и шок бомби. И полицијата на коњ се обиде да ја растера толпата. Најмалку 39 лица се уапсени поради нарушување на јавниот ред и мир.
„Тука сум за демократија, човекови права и правда“, изјави Јохан Канал, еден од учесниците на протестот, пренесува Индекс.
„Правото на протест не е право на блокада на земјата“, реагираше тогаш премиерот Нетанјаху. Демонстрантите, рече тој, ја преминаа црвената линија. „Суверена земја не може да толерира анархија“, заклучи Нетанјаху.
