Македонските фудбалски репрезентативци Александар Трајковски и Енис Барди, како и селекторот Благоја Милевски, ќе добијат дипломатски пасоши од страна на Министерството за надворешни работи.
Ова на брифинг го соопшти министерот за надворешни работи Бујар Османи, кој додаде дека поводот за оваа одлука е историскиот гол и големата победа над Италија.
– Тие во 11 часот ќе бидат фотографирани и ќе им бидат дадени дипломатски пасоши поради постигнатиот успех и голот против Италија. Станува збор за Александар Трајковски и Енес Барди, како и селекторот Боби Милевски. Тие се нашите најдобри амбасадори во моментов и го заслужуваат пасошот, како одделен доказ за нивните успеси. Им посакувам успех и во Португалија. Пасошот ќе го добијат во 12:30 часот – истакна Османи.
Инаку, македонската репрезентација утре заминува за Порто, каде во вторник треба да игра финале против Португалија.
