Полицијата во јужна Италија во вторникот соопшти дека запленила 2.700 килограми кокаин со висока чистота, скриен во два ладилни контејнери со банани кои биле испратени од Еквадор.Кокаинот пронајден во калабриското пристаниште Џоја Тауро би вредел повеќе од 800 милиони евра, се наведува во соопштението на италијанската полиција.
Пратката пристигнала од Гвајакил, Еквадор, а крајната дестинација била Ерменија, преку црноморското пристаниште Батуми, Грузија.
Дрогата била откриена во контејнери од 12 метри благодарение на специјални скенери, со помош на кучето трагач Џоел, додава полицијата.
Полицијата соопшти дека пронашла дополнителни 600 килограми кокаин во контејнери со овошје од Еквадор, кои биле испратени преку Џоја Тауро во изминатите неколку дена.
Овие пратки биле наменети за други делови на Италија, како и за Хрватска, Грција и Грузија, додаваат тие.
Калабрија е дом на Ндрангета, која ја замени сицилијанската Коза Ностра како најмоќната италијанска мафијашка организација и игра централна улога во трговијата со дрога.
