Овие шест работи стоматологот ги знае за вас веднаш штом ќе ја отворите устата
И додека кариесот, калкулусот и наслагите на забите ви се главна грижа кога одите на редовен преглед кај стоматолог, тој гледа работи кои воопшто немаат врска со забите. Имено, со оглед на тоа дека устата е прозорец кон целиот организам, стоматологот има увид во вашата целокупна здравствена состојба, а еве како.
1. Бремена сте
Зголемувањето на прогестеронот за време на бременоста го олеснува растот на бактериите кои предизвикуваат гингивитис, а истражувањата покажуваат дека речиси 40 проценти од жените ќе развијат гингивитис во бременоста. Некои трудници може да доживеат и црвена грутка на непцата, наречена тумор на бременост или пиоген гранулом, пренесува Индекс.
2. Грицкате нокти
Дури и без да гледате директно во вашите прсти, стоматологот може да каже дали сте роб на оваа грда навика. Знаци кои укажуваат на грицкање нокти се мали оштетувања и пукнатини на забите, но и трошење на забите кои се изложени на постојан притисок, велат стоматолозите. Во некои случаи, забите може да станат нерамни.
3. Дали сте го цицале палецот како дете?
Ако сте ги цицале палците или прстите по седумгодишна возраст, можеби сте развиле значителни промени во положбата на залакот и забите. Стоматолозите можат да видат знаци како што се испакнати предни заби, што може да влијае на растот и развојот на вилицата на детето, како и на говорните модели. За среќа, тоа може да се коригира со ортодонтски третмани, пред се со носење загради.
4. Дали имате некакви хронични заболувања
Лошиот здив не е само знак за лоша хигиена, туку и за хронични заболувања. Стоматолозите можат да разликуваат типови на здив, па „овошните“ мириси може да укажуваат на дијабетес кој не е под контрола или одреден тип на исхрана што не му одговара на телото, додека „рибните“ мириси може да укажуваат на проблеми со бубрезите или црниот дроб.
5. Дали страдате од нарушување во исхраната?
Многу стоматолози тврдат дека можат да видат дали имате пореметување во исхраната со само еден поглед на вашата усна шуплина. Имено, некои состојби како што е булимијата оставаат видливи последици на забите кои ниту еден стоматолог не може да ги пропушти. На внатрешната страна на забите е видлива ерозија, што доведува до кариес. Исто така, ако се појави ерозија на забите кои се подлабоко во вилицата, тоа може да биде показател за рефлукс, но и за употреба на антидепресиви кои го намалуваат количеството на плунка во устата.
6. Претерувате со засладени или газирани пијалоци
Можеби сте отсекнале заб од сосема друга причина, но постои индикација зошто вашите заби се слаби и подложни на расипување. Газираните пијалоци и другите засладени пијалоци можат да ги омекнат забите со текот на времето, велат стоматолозите. Слично на тоа, енергетските пијалоци, кои се малку покисели од безалкохолните пијалоци, можат да предизвикаат поголема штета на вашата забна глеѓ.
