Белградскиот суд му го продолжи притворот на таткото на 13-годишното момче кое во мај со пиштол уби девет ученици и еден чувар во едно белградско училиште. Судот го обвинува таткото на малолетниот стрелец за тешки нарушувања на општата безбедност и несоодветно чување оружје. Поради сомнение за запуштеност и злоупотреба, полицијата води истрага и за мајката на 13-годишникот.
Судот во Белград му го продолжи притворот за 30 дена на таткото на 13-годишното момче кое во мај со пиштол уби девет ученици и чувар во основно училиште во Белград. На таткото му се заканува затворска казна до 12 години. Српската полиција ја истражува и мајката на напаѓачот поради сомнение за злоупотреба и занемарување на малолетно лице.
На таткото му е продолжен притворот затоа што можел да го повтори делото доколку бил на слобода и затоа што делото за кое е обвинет му носи затворска казна над десет години, соопшти Вишиот суд во Белград.
Оттаму додаваат дека начинот на извршување и сериозноста на последиците од делото ја вознемириле јавноста, што може да го загрози непреченото и правично водење на кривичната постапка.
Таткото на 13-годишното момче е во притвор од 5 мај. Тој е обвинет за тешки повреди на општата безбедност, за што е предвидена затворска казна до 12 години. Тој е осомничен дека го научил синот како да пука со огнено оружје, како и дека неправилно го чувал оружјето со кое неговиот син го извршил стрелачкиот напад.
Во меѓувреме, српската полиција по наредба на државното обвинителство покрена истрага против мајката на 13-годишниот напаѓач поради сомнение дека сторила кривично дело запуштање и злоупотреба. 13-годишното момче по нападот е во психијатриска установа. Поради младоста не одговара кривично, а на татко му веднаш по нападот му е одредена мерка притвор во траење од 30 дена.
