Кина и Колумбија потпишаа заеднички план за соработка во рамките на иницијативата „Еден појас, еден пат“, објавија кинеските државни медиуми по состанокот меѓу претседателот Си Џинпинг и Густаво Педро во Пекинг.
Трговските врски меѓу двете земји значително се зајакнаа во последниве години, придонесувајќи за проширување на кинеското влијание во Латинска Америка и Карибите – регион од стратешко значење за Соединетите Американски Држави.
Кина моментално е втор најголем трговски партнер на Колумбија, веднаш по САД, а неодамна ја престигна Америка како главна извозна дестинација за колумбискиот пазар.
Според „Синхуа“, претседателот Си Џинпинг изјавил дека Кина е подготвена да го зголеми увозот на висококвалитетни производи од Колумбија, да ги поддржи кинеските компании што инвестираат и работат во земјата и да учествува во изградбата на инфраструктура.
Колумбискиот претседател Густаво Петро во понеделник објави дека неговата земја ќе се приклучи на глобалната иницијатива на Кина, започната во 2013 година, која има за цел да го обнови древниот Пат на свилата и да ги зајакне трговските и инфраструктурните врски на Кина со светот.
Повеќе од 20 латиноамерикански земји веќе учествуваат во програмата, која обединува над 150 земји од целиот свет. Сепак, во февруари оваа година, Панама објави дека се повлекува од иницијативата, што Кина го припиша на притисок од САД, пренесува Ројтерс.
