Можеби најпознатиот човек на светот, американскиот претседател Џо Бајден, во понеделникот ги изненади светските медиуми и вашингтонските коридори со ненајавена посета на Украина.Бајден изгледаше смирен кога се појави во Киев. Но, потребни беа вистински воени, дипломатски и медиумски акробации за тоа патување да стане реалност. Како всушност патувале се уште е тајна, пренесува ХРТ.
Голем број европски функционери отпатуваа за Киев од Полска со воз, но генерално не се сметаше веројатно дека американскиот претседател, со помошник со кодови за нуклеарно оружје, ќе помине часови во воз. Воздушниот пат исто така може да биде комплициран со оглед на секојдневните воздушни битки и ракетни напади во Украина.
Не е познато дали американските сили, воздушни или копнени, влегле во Украина за да ја заштитат или пак украинската војска, која тесно соработува со американските колеги, го обезбедила теренот.
Русите знаеја
Но, Белата куќа објави дека бил воспоставен директен контакт со Москва пред доаѓањето на Бајден, наводно во форма на строго предупредување.
„Ги информиравме Русите дека претседателот Бајден ќе пристигне во Киев. Ова го направивме неколку часа пред неговото заминување за да избегнеме конфликт“, рече советникот за национална безбедност Џејк Саливан. „Поради чувствителноста на таа комуникација, нема да навлегувам во тоа како тие одговорија или каква точно беше природата на пораката“, додаде тој.
Белата куќа соопшти дека целосните детали ќе бидат објавени подоцна.
Ова беше „историска посета, без преседан во модерното време“, посета на земја во војна каде што нема американски сили, рече Саливан, кој го придружуваше Бајден.
Бајден патувал од Киев под подеднакво тајни околности, според репортерот кој го придружувал наместо новинарската екипа што вообичаено го придружува.
