По четири години затвор добија креаторите на групата „Јавна соба“ на Телеграм, Дарко Костовски и Михаил Паневски, а пресудата ја донесе судијката Билјана Коцевска.
Костовски и Паневски се гонеа бидејќи дозволиле да биде достапно видео на кое се прикажани полови дејствија со дете. Двајцата одговараа за кривично дело производство и дистрибуција на детска порнографија.
– Обвинетите се огласуваат за виновни бидејќи првообвинетиот ја основал групата „Јавна соба“ на Телеграм, а второобвинетиот како модератор. Иако морале да внимаваат што се прикачува во групата, дозволиле да се направи достапно видео со порнографски елементи со дете – рече судијката.
Двајцата беа и во притвор поради опасност од бегство.
