Министерството за здравство на Уганда денеска објави „епидемија“ на вирусот ебола во таа земја, каде едно лице почина од ебола, три години по последната регистрирана смрт.
„Уганда го потврди избувнувањето на болеста со вирусот ебола во областа Мубенде. Потврдениот случај е 24-годишен маж…кој имал симптоми на болеста, а потоа починал“, соопшти Министерството на својот официјален профил на Твитер.
Случајот е предизвикан од редок вид на вирусот ебола кој доаѓа од Судан и не е регистриран во Уганда од 2012 година, соопшти Одделот за Африка при Светската здравствена организација.
СЗО за Африка објави дека ќе испрати тим и опрема за да помогне во истрагите и одговорот.
Уганда веќе имаше епидемии на ебола, а најновата беше во 2019 година, кога починаа пет лица. Во 2000 година, 200 луѓе починаа во епидемија на северот на земјата.
Еболата често е фатална болест, но сега има вакцини и лекови против оваа хеморагична треска, која на луѓето се пренесува преку заразени животни.
Болеста меѓу луѓето се пренесува преку телесни течности, а главни симптоми се треска, повраќање, крварење и дијареа.
Демократска Република Конго, соседната земја на Уганда, досега имаше 14 епидемии на ебола, а последната беше прогласена во април и јули 2022 година.
Еден случај на ебола беше пријавен во август во Демократска Република Конго во провинцијата Северен Киву, која граничи со Руанда и Уганда.
