Еден ирски турист стана „идиот на денот“ во Белгија откако, од само нему познати причини, реши да се качи на штотуку реновирана статуа во Брисел и случајно да ја уништи.
Пијан и издрогиран турист со еден потег успеал да ја скрши раката на статуата која е дел од големата зграда на Берзата во Брисел чие реновирање чинело вкупно 150 милиони евра.
Кога се симнал од статуата, го чекале другарите, а набрзо и полицијата од која се обидел да побегне.
Органите на редот го фатиле во блискиот ресторан за брза храна. Полицајците за медиумите во Брисел изјавиле дека мажот бил толку пијан и издрогиран што не можел да сфати колкава е штетата што ја предизвикал.
Самата реставрација на статуата чинела околу 19.000 евра, а несомнено е дека туристот ќе мора да ја плати од свој џеб, во спротивно ќе оди во затвор на долго време, пренесува Nieuwsblad.
Нел Вандевенет, проект-менаџер за реставрација на зградата на берзата, рече дека сега нема да може толку брзо да се врати раката на статуата на своето место.
-Би сакал да ви кажам дека поправката ќе оди брзо, но нема. Ќе бидат потребни неколку недели, можеби дури и месеци за да се обнови – рече Вандевенет.
Зградата на Берзата беше официјално отворена минатата саботата, а пијаниот турист од Ирска успеа да ја уништи статуата само еден ден потоа.