Рускиот парламент го изгласа законот со кој Москва се повлекува од ратификувањето на глобалниот договор за забрана на тестирање на нуклеарно оружје. Горниот дом, Советот на федерацијата, го одобри законот едногласно со 156 гласа, откако едногласно го усвои и Долниот дом, Думата. Сега законот оди на потпис кај претседателот Владимир Путин.
Претходно овој месец, Путин ги повика пратениците да ја воведат промената за да ја „изрази“ став на Соединетите држави, кои го потпишаа, но никогаш не го ратификуваа Договорот за сеопфатна забрана на нуклеарни тестови (CTBT). Русија вели дека нема да продолжи со нуклеарно тестирање доколку не го стори тоа Вашингтон, но експертите за контрола на оружјето се загрижени дека тоа би можело да доведе до тестирања што Западот би ги сметал за заканувачка ескалација во контекст на војната во Украина.
Иако никогаш формално не стапи во сила, CTBT го направи табу нуклеарното тестирање – ниту една друга земја освен Северна Кореја не извршила тест што вклучува нуклеарна експлозија овој век. Експертите за контрола на оружјето велат дека руски или американски тест може да предизвика нова трка во вооружување во време на акутна меѓународна тензија, со војни кои беснеат во Украина и на Блискиот Исток. Тие велат дека ако една земја изврши нуклеарна проба, друга веројатно би го направила истото, а трети како Кина, Индија и Пакистан би можеле да го следат примерот.
Си-Ен-Ен минатиот месец објави сателитски снимки на кои се гледа дека Русија, САД и Кина изградиле нови капацитети на нивните полигони за нуклеарни тестирања во последниве години.
Американското Министерство за енергетика минатата недела соопшти дека извршило хемиска експлозија на полигонот за нуклеарни тестирања во Невада со образложение дека тестот е „за да ја подобри способноста на Соединетите Држави да детектираат нуклеарни експлозии со мала моќност низ целиот свет“.
Говорејќи пред руските пратеници пред гласањето на законот, заменик-министерот за надворешни работи Сергеј Рјабков рече дека експлозијата во Невада „несомнено е политички сигнал“.
-Како што рече нашиот претседател, мораме да бидеме внимателни и ако САД се придвижат кон започнување нуклеарни тестови, ќе мора да одговориме овде на ист начин – рече Рјабков.
