Норвешкиот крал Харалд V е хоспитализиран поради инфекција.
Кралот Харалд Петти е примен во болница и се лекува од инфекција, објави во понеделникот норвешката палата.
„На кралот му е дијагностицирана инфекција која треба да се лекува, па ќе остане во болница неколку дена“, беше објавено.
Наведоа дека состојбата на монархот (86) е стабилна.
Не се објавени други детали освен дека монархот се наоѓа во Рикшоспиталет, главната болница во Осло.
Харалд, кој беше виден како користи патерици во последните неколку години, беше хоспитализиран неколку пати во последните месеци.
Во декември, исто така, беше примен во болница поради инфекција и беше лекуван со интравенски антибиотици. Тој беше хоспитализиран и во август три дена.
Тој имаше успешна операција за замена на срцевиот залисток во октомври 2020 година, откако беше хоспитализиран поради тешкотии со дишењето.
