Градоначалникот на Киев Виталиј Кличко изјавил дека главниот град на Украина повторно би можел да стане цел на руските копнени сили, известува германскиот Билд.
– Киев беше и останува цел на (рускиот претседател Владимир) Путин бидејќи главниот град е срцето на земјата. Но, сега сме многу подобро подготвени за тоа одошто пред 2 години. Ако Путин ја донесе таа одлука, тоа ќе биде крвава одлука – изјавил Кличко.
Кличко го дал интервјуто пред уништената станбена зграда која пред неколку дена била погодена од руски проектил. Притоа, тој го повикал Западот да ја зајакне својата поддршка за Украина.
– Итно ни треба повеќе противвоздушна одбрана, повеќе противвоздушни ракети – потенцирал градоначалникот на Киев.
Тој одговорил и на коментарите на некои западни политичари за преговорите или т.н „замрзнување на војната“.
– Тоа е погрешен став. Наместо тоа ни треба поголема поддршка. Нема да ѝ дадеме на Русија никаква територија. Нема компромис за тоа – додал Кличко.
