Најмалку 21 лице загина во Киев во големиот воздушен напад од Русија утринава. На Меѓународниот ден на мирот руските авиони го нападнаа и Харков, Черкази, Хмелницки, Ривне, Виниција, Лавов и Ивано-Франковск, пренесува Ројтерс.
Денешниот ден, 21 септември, е прогласен за меѓународен ден на мирот во Обединетите Нации во 1981 година, а иницијативата била на Велика Британија и на Костарика.
Рускиот напад се совпадна со вчерашното обраќање на украинскиот претседател Володимир Зеленски пред Генералното собрание на Обединетите Нации. Таму тој ја претстави својата „формула за мир“.
Извори за Ројтерс велат дека слушнале експлозии во Киев, а дека властите испратиле спасувачки екипи во неколку градови. Министерот за внатрешни работи на Украина, Ихор Клименко, изјави дека во нападите, кои се случија рано утрото, има повредени во регионите Киев и Черкаси и во градот Харков на истокот на земјата.
„Беше немирно утро. Се слушнаа експлозии во различни региони на Украина“, напиша тој на апликацијата за пораки Телеграм.
Градоначалникот Виталиј Кличко изјави дека седум лица се повредени во Киев, меѓу кои и едно деветгодишно девојче.
Фрагменти од проектилот паднале во центарот на градот, а оштетени се и инфраструктурни објекти и неколку нестанбени објекти, што предизвикало пожар, рече тој. Клименко вели дека хотел и неколку киосци биле оштетени во Черкаси во централна Украина, додека седум лица се повредени.
Максим Козицки, гувернер на Лавов, рече дека три руски ракети го погодиле западниот град Дрохобич, на околу 60 километри од полската граница. Козицки рече дека се погодени инфраструктурни објекти и магацини.
Во одделен напад во текот на ноќта, две лица беа убиени од руско гранатирање во јужниот град Херсон, изјави гувернерот Олександар Прокудин.
