Експлозија изутрината одекна во хемиската фабрика Меламин во центарот на Кочевје. Полицијата ги повикува жителите во областа да ги затворат прозорците и да не излегуваат надвор.Во 8.35 часот полицијата добила дојава дека во центарот на Кочевје одекнала експлозија или дека избувнал пожар. Според полициската управа на Љубљана, итните служби се на терен, а затворен е главниот пат низ Кочевје.
„Ги советуваме сите жители во околината да ги затворат прозорците и да не се движат на отворено за време на интервенцијата. Исто така, не треба да се приближуваме до местото на настанот“, велат од полицијата.
Во краткото интервју за N1 Словенија, градоначалникот на Кочевје, Владимир Пребилич, изјави дека во моментов заседава штабот за вонредни состојби.
Според последните податоци, Управата за цивилна заштита и помош при катастрофи на Република Словенија соопшти дека во експлозијата се повредени повеќе од десет лица, а едно лице се здобило со тешки изгореници.
Активирани се противпожарните бригади, медицинските единици, единицата ЕЛМЕ (Еколошка лабораторија со мобилна единица), а активирана е и хеликоптерска помош, велат оттаму. Од Здравствениот дом Кочевје изјавија за N1 Словенија дека сите единици на Брзата помош се на терен.
