Во текот на ноќта во Косовско Поморавље три бомби биле фрлени врз куќи на претставници и раководители на Српската листа, соопшти владината канцеларија за Косово и Метохија. „Со цел да ги заплашат и принудат да ги напуштат своите огништа, се со цел етничко чистење на Србите, кое Курти континуирано го спроведува“, се вели во него.
„Прво околу 2 часот и 30 минути е фрлена бомба во дворот на Срѓан Ристиќ во Ранилуг, директорот на предучилишната установа „Пчелица Маја“. Причинета е голема материјална штета, но за среќа членовите на семејството се добро. Истовремено, бомба била фрлена и врз семејната куќа и гаражата на Владица Аритоновиќ во селото Глоговце, кој е заменик градоначалник на општина Ранилуг. И тука е причинета голема материјална штета, а во нападот нема повредени“, соопштено е.
Во текот на ноќта експлозивна направа била фрлена и кон куќата на Зоран Ристиќ од Ранилуг, директор на Центарот за социјална работа, но немало експлозија, се додава.
„Станува збор за брутално заплашување на претставниците на Српската листа, кои дојдоа само неколку дена по заканите на Аљбин Курти дека Србите и Српската листа „ќе трпат и ќе платат“. „Курти почна да го реализира својот план со тоа што прво уапси тројца Срби, а сега гледаме дека се фрлени бомби врз три српски куќи“, се вели во соопштението на Канцеларијата за Косово и Метохија.
Во таа канцеларија очекуваат „насилните напади врз претставниците на Српската листа да бидат сфатени сериозно и да се истражат, бидејќи тие испраќаат јасна порака и закана до Србите да ги напуштат своите вековни огништа“.
Се додава дека канцеларијата ќе ги информира и меѓународните претставници за овие напади, бидејќи таквите дејствија со обележја на тероризам не треба да се сфатат лесно.
