Посетата на Скопје на високиот претставник на ЕУ за надворешна политика и безбедност Жозеп Борел, според министерот за надворешни работи Бујар Османи е исклучително важна, прва на високиот претставник и почна во Македонија што е порака сама за себе.
– Се разбира, неговото портфолио не е проширувањето. Тој е висок претставник за надворешна и безбедносна политика, а проширувањето е внатрешна политика на ЕУ и за тоа има посебен комесар, тоа е комесарот Вархеји. Меѓутоа, мислам дека пораката на неговото доаѓање вчера тука како прва дестинација, фактот што Република Северна Македонија постигна стопроцентно усогласување со надворешната и безбедносната политика на ЕУ и тој дојде лично да ја поздрави таа одлучност на државата и сега станавме едно симболично трио на 100 отсто кандидати, бидејќи сега Албанија, Црна Гора и Северна Македонија се трите држави во регионот коишто имаат стопроцентно усогласување на надворешната политика со таа на ЕУ и некако го регрупира и регионот по однос на перспективата за ЕУ – вели Османи.
Тој рече дека бугарскиот премиер Кирил Петков информира дека Борел од Скопје се слушнал и со него и смета дека тоа е обид да се помогне.
На прашањето дали ситуацијата во Украина ќе ни помогне или одмогне во донесување евентуална одлука во јуни за старт на преговорите со ЕУ, Османи истакна дека во моментов првостепено е прашањето на Украина каде гинат луѓе, а земјава не е во фаза на убедување на Унијата, бидејќи ние имаме поддршка од 26 земји членки, а единствено имаме разлики со Бугарија која бара гаранции за имплементација на Договорот од 2017 година.
– Состојбата во Украина покажа дека времето за калкулации за популарноста на темата проширување во земјите членки станува апсолутно веќе неважно. Ова е прашање на безбедносно консолидирање на ЕУ. Ние сме на портите на Унијата, а чуварите на портите треба да бидат најбезбедните за да го зачуваат домот од малигни влијанија, нелегална миграција, тероризам… Портата е тука на Балканот и доколку оставаат портата да биде небезбедна, нема да биде безбеден ни дворот, ни домот. Сега тие сфаќаат колку е важен овој регион за безбедносната консолидација. Во тој контекст сметам дека свесноста е поголема. Дали ќе помогне, дали тоа ќе помогне во Бугарија не можам да кажам, но ќе покаже времето – рече шефот на дипломатијата Османи.
Османи ја најави посетата на неговата министерката за надворешни работи на Бугарија, Теодора Генчовска на 23 и 24 март во Скопје. Тој информираше дека на Дипломатскиот форум во Анталија имал средба со бугарскиот премиер Кирил Петков, со кого разговарале за случувањата во Украина, ангажманите на двете држави визави војната, а на најголемиот дел од средбата се осврнале на отворените прашања.
– Разговаравме за сите точки, констатиравме дека навистина треба да се донесат одлучни одлуки во овој период поради тоа што очигледно прашањето на европското проширување станува сериозно безбедносно прашање за регионот и за ЕУ и секоја земја членка има одговорност кон безбедноста на регионот, но и кон безбедноста на целиот континент. Значи, веќе не е прашање само на кредибилитетот на ЕУ, туку е безбедноста на регионот и ова се сведува во оваа ситуација, пред сѐ, на европска безбедност, процесот на проширување односно комплетирање на ЕУ – рече Османи.
Тој подвлече дека се уште постојат разлики, меѓутоа се обидуваат да дојдат до погледи коишто може да бидат прифатливи за двете страни.
– Значи немаше таква инсинуација дека има разлика кај нас, туку поради некој записник од Брисел се констатираше дека има разлики меѓу нивното МНР и другите чинители во коишто јас нема да се мешам, бидејќи тоа се внатрешни односи таму, ние разговараме со бугарската Влада. Ние немаме апсолутно никакви разлики, ниту експертите во МНР, ниту јас како политичко раководство на МНР, ниту премиерот. Сите сме во постојана координација, вчера имавме една долга средба за координирање, денеска попладне ќе имам повторно средба за координирање. Значи ние сме апсолутно унисони и во ставовите, во позициите без никакви разлики во овој процес, што навистина ми е задоволство, бидејќи во таква атмосфера се работи многу полесно – дециден Османи.
Тој вели дека нема впечаток оти има различни ставови во Бугарија, динамиката на разговорите е предвидена до јуни, согласно работните групи, согласно политичкиот процес.
– Тоа се главните три прашања – како, кога и на кој начин. Сѐ уште сме во различни позиции по однос на трите прашања, но фактот што се сретнуваме толку често е предуслов да може да се успее. Ние сме унисони и функционираме во рамки на нашата Резолуција на нашиот Парламентот. Се разбира и во Република Бугарија ги имаат своите ставови, но гледам волја кај двете страни да се најде решение кое ќе биде прифатливо за двете страни. Веројатно ќе има понатаму и средба на највисоко политичко ниво. Битно е континуирано да разговараме отворено. Тоа што го имаме сега е дека разговараме отворено, секој претставувајќи ги своите позиции. Не можам да навлезам во детали во оваа фаза – посочи шефот на дипломатијата.
