Кина го обвини НАТО дека ги „доведува тензиите меѓу Русија и Украина до крајна точка“.
Портпаролот на кинеското Министерство за надворешни работи Жао Лиџијан на дневниот брифинг ги повика САД сериозно да ја сфатат загриженоста на Кина и да избегнуваат поткопување на нејзините права или интереси во решавањето на ситуацијата во Украина и врските со Русија, објави Ројтерс.
Жао им рече на новинарите дека „мафтањето на санкциите на секој чекор никогаш нема да донесе мир и безбедност, туку ќе предизвика сериозни тешкотии за економиите и егзистенцијата на засегнатите земји“.
Тој рече дека Кина и Русија „ќе продолжат да ја следат нормалната трговска соработка, вклучително и трговијата со нафта и гас, во духот на взаемно почитување, еднаквост и взаемна корист“.
Тајван ја следи Кина, Кина и светот ја следат Украина
И додека Кина и светот гледаат што се случува во Украина, во Тајван расте загриженоста.
– Кина внимателно ги следи настаните во Украина за да ја процени сопствената стратегија кон Тајван – предупреди тајванскиот министер за надворешни работи.
– Кога ги следиме случувањата во Украина… ние исто така многу внимателно гледаме што Кина може да направи со Тајван – рече Џозеф Ву на прес-конференција.
Некои аналитичари укажаа на паралели меѓу плановите на Русија за Украина и стравувањата за иднината на Тајван – самоуправна островска демократија што Пекинг ја присвојува, и не ја исклучија можноста да ја преземе насилно.
– Кинеските лидери мислат дека западната реакција на руската агресија е слаба и некохерентна и нема никакво влијание. Кинезите би можеле да го видат ова како позитивна лекција – додаде Ву додека зборуваше за дополнителните чекори што Тајван ги презема.
Запрашан дали е загрижен за кризата во Украина, Ву рече дека светот гледа „ширење на авторитаризмот“, укажувајќи на заедничката декларација издадена од Кина и Русија минатиот месец.
„Подготвени сме да преземеме активна улога“
Кина, која традиционално одржува добри врски со Москва, досега одбиваше да зборува за инвазија на Украина и само „изрази жалење“ за конфликтот во таа земја, велејќи дека сè уште ја „разбира“ загриженоста на Русија за нејзината безбедност.
Но, во телефонски разговор со Макрон и Шолц, првиот човек на Пекинг вчера изјави дека Кина е „искрено тажна поради новата војна на европскиот континент“, објави „CCTV“.
– Сакаме да повикаме на поголема воздржаност за да се спречи хуманитарна криза од големи размери – рече Си Џинпинг, притоа не осудувајќи ја офанзивата на 24 февруари што ја започна рускиот претседател Владимир Путин против соседната земја.
Тој на своите соговорници им порача дека „ги цени напорите на Франција и Германија да посредуваат во Украина“ и нагласи дека и Пекинг е подготвен да преземе „активна улога“.
– Мораме да работиме заедно за да ги поддржиме мировните преговори меѓу Русија и Украина – повика тој откако три рунди разговори во Белорусија досега не успеаја да ја запрат војната.
– Кина е „подготвена да испрати хуманитарна помош во Украина“ – рече Кси. Претседателот повтори дека неговата земја во принцип се противи на меѓународните санкции, велејќи дека мерките наметнати на Москва „ќе им наштетат на сите страни“.
