И вработените во Управата за водење на матични книги од утре почнуваат штрајк за повисоки плати. Нема да работат шалтерите за поднесување барања за издавање на изводи од матичната книга на родени, венчани, умрени. Штрајкот утре ќе почне во 8 часот, а го организира Независниот синдикат за водење на матични книги.
Вработените во оваа управа тврдат дека никој не го вреднува нивниот труд и затоа се одлучиле преку штрајк да добија повисоки плати и издејствуваат преговори и потпишување на колективен договор.
„Во недостаток на социјален дијалог ова е единствениот пат за достоинствено вреднување на нашиот труд“, напишаа на фејсбук од Независниот синдикат за водење на матични книги.
Според претседателот на Независниот синдикат на Управата за матични книги, Тони Милошески, оваа одлука следи откако им било ставено до знаење дека нема да бидат прифатени нивните барања.
-Порастот на минималмната плата донесе до изедначување на платите кај вработените со најразлични статуси, ние како Синдикат сметаме дека треба да има линеарно покачување од причина што трошоците за живот во континуитет растат, а платите на вработените долги години наназад воопшто не се покачени, дури и одредени вработени земаат под минималната плата која е загарантирана со закон – рече Милошески на денешната прес-конференција.
Тој рече и дека колективниот договор е потребен како за вработените, така и за самата Управа.
-Вработените се соочуваат со одредени специфични работи кои треба дополнително да се уредат со колективниот договор. Носењето на овој договор е повеќе од потребен како и на вработените така и на самата Управа, бидејќи ќе се подобрат правата на вработените, а Управата ќе добие работници помотивирани за извршување на своите работни задачи – рече Милошески.
