За случајот со плацовите за ЕВН реагираа од политичките партии. Според СДСМ, случајот водел кон ВМРО – ДПМНЕ и се сомневаат дека со парите кои ги добиле осомничените, се финансирала и таа партија. Но, ВМРО ДПМНЕ ги отфрла ваквите обвинувања и бара секој кој се огрешил пред законот, да одговара.
– Еден од осомничените е телохранител на Мицкоски, извесен Влатко Илиевски, со договор вреден неверојатни 500.000 евра или половина милион евра. Јавно достапните информации во медиумите покажуваат дека на крајно сомнителен начин продал парцели од речиси 40.000 метри квадратни. Но, тој не ги купил туку ги добил на подарок. Осомничен за кривично дело „измама во службата“ е и Игор Гиевски, поранешен претседател на УМС на ВМРО-ДПМНЕ. Понатаму, осомничен е и Мирослав Митовски, син на екс-градоначалник од ВМРО-ДПМНЕ во Ѓорче Петров“, изјави Дарко Каевски, пратеник и портпарол на СДСМ.
Лидерот на ВМРО ДПМНЕ одговори дека власта конструира лаги и измислици за да ја дефокусира јавноста од тешкиот живот и инфлацијата.
– Се обидуваат да ја дефокусираат јавноста од девијантното однесување во Парламентот, инфлацијата, тешкиот живот, сите оние фаули коишто ни се случуваат секојдневно, со тоа што нешто ќе поврзат негативно во општеството кон мене. Да бидеме јасни и прецизни, јас верувам во презумција на невиност, но исто така секој оној кој се огрешил пред законот, родена сестра и брат да ми е, ќе одговара. Времето на неказниви поединци во општеството, заврши“, рече Христијан Мицкоски, претседател на ВМРО – ДПМНЕ.
