Двајца припадници на американската морнарица „фоки“, кои исчезнаа во Црвеното Море, во близина на брегот на Сомалија за време на мисијата за запленување на оружје од иранско производство наменето за Хутите, се прогласени за мртви по неуспешната 10-дневна потрага, соопшти американската војска.
„Фоките“ кои се исчезнати 10 дена, сега се претпоставува дека се мртви. Фокусот сега е на пронаоѓање на нивните останки, се вели во синоќешното соопштение на американската централна команда (ЦЕНТКОМ).
Американските специјалци учествуваа во операција на 11 јануари чија цел беше неозначен брод за кој се верува дека носел делови за ирански ракети наменети за Хутите. Во акцијата, едниот маринец паднал во бурното море, а другиот скокнал во водата за да му помогне. Оттогаш и двајцата се водат како исчезнати.
Американската морнарица го оценила бродот опасен и го потопила. Сите 14 членови на екипажот биле приведени.
