Возилото што го носеше ковчегот со телото на кралицата Елизабета Втора во текот на попладневните часови се движеше низ центарот на Единбург, за да можат поданиците да му оддадат последна почит, а на парадата беше и новиот крал Чарлс Трети, пренесува Би-би-си.
Сите четири деца на кралицата – кралот Чарлс, принцезата Ана, принцовите Ендру и Едвард, се во поворката зад ковчегот, додека кралицата Консорт Камила и грофицата од Весекс Софија, сопруга на принцот Едвард, ќе бидат во возилото.
По патот по кој минуваше поворката се собраа неколку илјади луѓе.
Ковчегот со телото на кралицата пристигна во Единбург во неделата, во замокот Холирудхаус, каде што беше до попладнево, по што беше пренесен во катедралата во Единбург.
Влезот на граѓаните во соборниот храм ќе биде дозволен од 17 часот.
Британскиот крал Чарлс Трети изутрината во обраќањето пред пратениците во британскиот парламент најави дека решително ќе го следи примерот на својата мајка, покојната кралица Елизабета Втора.
„Додека стојам пред вас, не можам а да не ја почувствувам тежината на историјата што не опкружува и ме потсетува на клучните традиции на парламентот на кои членовите на двата дома се посветени за доброто на сите“, рече новиот крал во Вестминстерската сала. .
Британската кралица почина на 8 септември на 96-годишна возраст во замокот Балморал во Шкотска. Таа ќе биде погребана на 19 септември во Лондон.