Високите температури зафатија делови од Европа, која едвај се опорави од последниот топлотен бран.
Суши и шумски пожари ги погодија Шпанија и Португалија, а жештината се прошири и во Франција и Велика Британија.
Се очекува дека температурите ќе го достигнат врвот во четврток во Франција и Шпанија, а властите ги откажаа традиционалните огномети на националниот ден на Франција за да го намалат ризикот од пожари.
Топлотните бранови станаа почести, поинтензивни и подолготрајни поради климатските промени. Светот веќе се загреа за околу 1,1 Целзиусови степени од почетокот на индустриската ера, пишува Би-Би-Си.
Екстремни горештини на северот на Шпанија
Жештините што беснеат во Шпанија се невообичаени по тоа што ја зафаќаат речиси целата земја.
Високи температури често се бележат во летните месеци, особено во јужните и централните делови на земјата.
Се очекува во следните два дена температурите да продолжат да растат во повеќе области. Се очекува дека во североисточниот град Сарагоса ќе има температури до 42 °C, додека Бадахоз, на југозапад, би можел да забележи до 47 °C во четврток.
Високи температури низ Португалија
Според Националниот метеоролошки институт IPMA, невидени 80 отсто од копното на Португалија се во „екстремен“ ризик од пожар.
Од денеска до четврток се очекува постепено влошување на условите, бидејќи во текот на ноќта во одредени области температурите ќе се покачат. IPMA предвидува максимални температури до 47 °C во наредните денови.
