Американскиот претседател Џо Бајден го покани украинскиот претседател Володимир Зеленски на средба во Белата куќа во вторник, 12 декември, објави во неделата Белата куќа.
Белата куќа соопшти дека двајцата претседатели ќе разговараат за „итните потреби“
на Украина во војната против Русија.
Зеленски ќе пристигне во Вашингтон во понеделник, објави неговиот кабинет на Телеграм, додавајќи дека за време на работната посета ќе се сретне со претседателот Бајден и ќе има „низа состаноци и разговори“.
Клучните теми ќе бидат одбранбената соработка меѓу САД и Украина, „особено во заедничките проекти за производство на оружје и системи за противвоздушна одбрана и координација на напорите на двете земји во наредната година“, соопшти кабинетот на украинскиот претседател. .
Воздушен напад врз Киев
Русија изврши воздушен напад врз Киев во текот на ноќта, а остатоци од собореното оружје паднаа во неколку области, при што беа повредени најмалку две лица и оштетена станбена зграда, соопштија во понеделникот властите во главниот град на Украина.
Виталиј Кличко, градоначалникот на Киев, на апликацијата за пораки Телеграм изјави дека маж и жена се здобиле со рани од шрапнели во областа Дарницки во југоисточниот дел на градот.
Тој додаде дека итните служби биле испратени во областа Холосивски во југозападниот дел на Киев, каде дел од проектилот удрил во покривот на станбена зграда, предизвикувајќи пожар кој веднаш бил изгаснат.
Серхи Попко, шеф на градската воена управа во Киев, на Телеграм рече дека системите за противвоздушна одбрана „собориле непријателски цели“, сугерирајќи исто така дека Русија го нападнала Киев со проектили.
Очевидци на Ројтерс слушнале неколку силни експлозии веднаш по 4 часот наутро.
Сè уште не се познати размерите на нападот и целосниот обем на штетата.
