Меѓународната фудбалска федерација (ФИФА) во писмо испратено до сите федерации чии репрезентации учествуваат на Светското првенство во Катар, бара од учесниците на овогодинешниот најголем спортски настан да се концентрираат на фудбалот и да не дозволат спортот да биде вовлечен во идеолошки или политички борби. .
„Ве молам, да се концентрираме на фудбалот! Знаеме дека фудбалот не постои во вакуум и свесни сме за многуте предизвици и тешкотии од политичка природа кои постојат ширум светот. Сепак, ве молиме, не дозволувајте фудбалот да биде вовлечен во секоја идеолошка и политичка борба што постои“, стои во писмото што заеднички го потпишаа претседателот на ФИФА, Џани Инфантино и генералниот секретар Фатма Самура.
ФИФА не одговори на истрагата на Ројтерс за веродостојноста на информациите објавени од Sky News, но од Австралиската фудбалска асоцијација потврдија дека добиле писмо од чадор фудбалската организација без да навлегуваат во содржината на истиот.
Писмото на ФИФА е реакција на бројните протести кои можеа да се слушнат и видат во последните неколку недели во многу земји чии репрезентации ќе играат во Катар, а се однесуваат на теми како што се правата на припадниците на ЛГБТИК заедницата во оваа арапска земја или односот кон странски работници, од кои многумина учествуваа во изградбата на инфраструктурата потребна за домаќин на Светското првенство, кое за прв пат во историјата ќе се одржи на Блискиот Исток.
Минатата недела стигнаа критики од Австралија за односот на Катар кон човековите права и истополовите врски. Данскиот фудбалски сојуз објави дека нивните репрезентативци ќе патуваат на Мундијалот без членови на блиското семејство, во знак на протест против начинот на кој Катарците ги третираат човековите права.
Организаторите на Мундијалот им посакаа добредојде на сите во својата земја, без разлика на потеклото и сексуалната ориентација, но и предупредија на несоодветноста да се изразуваат љубовните чувства на јавен простор. Катар призна дека има одредени недостатоци во нивното работно законодавство, но додаде дека организацијата на Светското фудбалско првенство им помогнала да напредуваат по прашањето за правата на работниците.
„Во ФИФА се стремиме да ги почитуваме сите мислења и ставови, без да му даваме морални лекции на остатокот од светот. Една од најголемите светски силни страни лежи во неговата голема различност, и ако вклучувањето има некакво значење, тоа е почитување на различноста. Ниту еден човек, ниту култура, ниту еден народ не е „подобар“ од друг. Тој принцип е основа на меѓусебното почитување и општество без дискриминација. Тоа е исто така една од основните вредности на фудбалот. Затоа, да го запомниме тоа и да дозволиме фудбалот да заземе централно место“, се вели во писмото на ФИФА, според извештајот на Sky News.
