Научниците следат нов вирус од животинско потекло во источна Кина, кој зарази десетици луѓе.
Кај 35 пациенти во провинциите Шандонг и Хенан е пронајден нов Лангја хенипавирус (LayV). Многумина имаа симптоми како треска, замор и кашлица.
Се претпоставува дека вирусот го добиле од животни, а засега нема докази дека овој вирус се пренесува меѓу луѓе. Истражувачите го откриле вирусот претежно кај шурките.
Еден од истражувачите, Ванг Линфа од Медицинскиот факултет Дјук-НУС во Сингапур, изјави за кинескиот државен Глобал Тајмс дека случаите на инфекција досега потврдени не се фатални или многу сериозни, така што „нема потреба од паника“.
Сепак, Ванг додава дека треба да се биде внимателен бидејќи многу вируси кои постојат во природата имаат непредвидливи резултати кога ги инфицираат луѓето.
Тајванскиот Центар за контрола на болести соопшти дека посветуваат „големо внимание“ на развојот на LayV, пишува Би-Би-Си.
LayV е вид на хенипавирус кој спаѓа во категоријата зоонозни вируси кои можат да преминат од животните на луѓето. Зоонотичните вируси се многу чести, но од избувнувањето на пандемијата на Ковид тие привлекуваат се поголемо внимание.
Некои зоонозни вируси, како што е вирусот Нипа, може да бидат потенцијално фатални за луѓето.
Американскиот центар за контрола и превенција на болести проценува дека три од четири нови заразни болести потекнуваат од животни, а Обединетите нации предупредуваат дека светот ќе има повеќе такви болести поради климатските промени и зголемената експлоатација на дивиот свет.
