Годишниот извештај на Народниот правобранител покажува дека една третина од претставките кои се однесуваат на правосудството и изминатата година биле за постапките на извршителите.
Од таму велат дека високите камати се еден од главните проблеми со кои се соочуваат ранливите категории во Македонија, а во социјална држава не е дозволиво каматата да биде три пати поголема од основниот долг. Најавија дека ќе бараат измени на законот со кој таа би се ограничила најмногу до 100% од основниот долг.
– Сведоци сме дека има граѓани кои заради основен долг и постојаното зголемување на каматата скоро цел живот стануваат должници према доверителите преку извршителите. Не се во состојба заради минималните примања да го исплатат долгот и износот на каматата и на тој начин тие стануваат цел живот должници – Насер Зибери.
Значаен број на претставки има и за казнето-поправните установи. Народниот правобранител Зибери вели во затворите и воспитно поправните домови поради високиот број на затвореници, голем дел од нив се принудени да спијат на душеци во ходници, а не била обезбедена основна здравствена заштита ниту пак образовна настава за малолетниците. Зибери најави дека ќе побара дислокација на малолетничките во затворот Идризово бидејќи тие биле загрозени од полнолетните осуденички.
– Условите во кои се задржани честопати ги прекршуваат елементарните законски правила, а тоа е контакт со возрасни осуденички, честопати доведени до ситуација да бидат и загрозени, заканети, а тука посебно изостанува и делот на овозможување на здравствена заштита бидејќи амбулантниот дел во затворот е во затворениот дел – вели Омбудсманот.
Непочитувањето на основните човекови права според извештајот на Народниот правобранител и минатата година останале главен проблем. Од вкупно 2.085 прифатени претставки во 755 било констатирано кршење на човековите права.
