Десетици општински пратеници од Москва и Санкт Петербург го повикаа претседателот Владимир Путин да поднесе оставка во отвореното писмо објавено во понеделникот, пишува МоскваТајмс.
Повикот до рускиот претседател да се повлече доаѓа во време на тврдењата за местење на гласовите на локалните и регионалните избори викендов, како и неуспехот кој Русија го доживеа по украинската офанзива во Харков.
Нејзините потписници, исто така, се изложија на ризик од казнување според законите усвоени набргу по инвазијата на Русија во Украина, со кои практично се забранува секое антивоено несогласување.
„Постапките на претседателот Путин се штетни за иднината на Русија и нејзините граѓани“, се вели во петицијата споделена на Твитер од Ксенија Торстрем, заменик на областа Семјоновски во Санкт Петербург.
„Бараме оставка на Владимир Путин од функцијата претседател на Руската Федерација“, продолжува изјавата, првично потпишана од 19 пратеници.
Според Торстрем, уште 84 лица ја потпишале петицијата во понеделникот.
„Добиени се уште 84 потписи, сега ќе ги провериме“, напиша таа.
Независното тело за набљудување на изборите „Голос“ објави десетици случаи на полнење гласачки ливчиња, заплашување, купување гласови и погрешно евидентирани гласови, откако партијата Обединета Русија на Путин победи на изборите.
Повиците од пратениците Путин да се повлече првично се појавија минатата недела откако Дмитриј Паљуга, пратеник од областа Смолнинскоје во Санкт Петербург, ја повика Државната Дума да му суди на претседателот под обвинение за предавство поради неговата окупација на Украина. Паљуга беше повикан во полициска станица под можни обвиненија за „дискредитација“ на руската армија, но подоцна беше ослободен.
