Алатката „балансер“, со која се определува од која национална припадност ќе бидат кандидатите што имаат предност при некое вработување во јавна институција, треба да се укине затоа што се злоупотребува – изјави Нури Бајрами од Државната комисија за спречување на корупција во настап на ТВ 21.
– Луѓето лажат за нешто што е најчувствивтелно за нив, за да можат да се вработат – рече Бајрами.
Тој вели дека се случувало едно лице во еден ист оглас да се определи како Македонец, како Албанец и како Ром! Според Бајрами, балансерот веќе станал алатка за понижување.
– Замислете сега, без исклучок, и раководни лица на управни институции и лица во обвинителството, толкуваат дека тоа е неотуѓиво уставно право на определба, слобода на декларирањето на етничката припадност. Не е точно, како е можно во истиот оглас, кога аплицираш во 15 минути на повеќе работни места, да се изјаснуваш во три различни етнички заедници? Не, слободата е до тука. Ти можеш да се определиш, никој нема да ти пречи, но треба да се спроведува некоја постапка, треба да ги избришеш сите евиденции каде веќе еднаш си се изјаснил поинаку – рече Бајрами.
