Претседателот на општина Прешево Шчиприм Арифи изјави дека испратил официјална покана до косовскиот премиер Аљбин Курти и претседателката Вјоса Османи да ја посетат оваа општина на југот на Србија, но дека тие не одговориле.
Арифи рече дека косовските политичари треба да знаат со какви проблеми и неволји се соочуваат Албанците во Србија и дека затоа е неопходна посетата, пренесува Бујановачко.
„Го поканивме премиерот Аљбин Курти да го посети Прешево. Испративме и официјална покана до претседателката Вјоса Османи. Тие се уште не одговориле. Прешево е Косово, секој Албанец од Косово е дома кога доаѓа во Прешево. Треба да дојдат и да видат какви се грижите и проблемите во оваа област“, рече Арифи.
Тој истакна дека Османи и Курти „треба да ја посетат Прешевската долина“, по неодамнешната посета на српската премиерка Ана Брнабиќ на Косово.
