Во шумските пожари што почнаа да ја опустошуваат Европа во последните неколку недели, веќе е изгорена поголема површина отколку во пожарите во цела 2021 година, објави Европскиот информативен систем за шумски пожари (EFFIS).
Ширум Европската унија, пожарите изгореа 517.881 хектари оваа година заклучно со 16 јули – нешто повеќе од 5.000 квадратни километри, со големина на Тринидад и Тобаго, објави во четвртокот службата за сателитски мониторинг на ЕУ.
Во текот на 2021 година, 470.359 хектари шуми беа уништени од пожари, главно во Италија и Грција.
Во 2022 година беснеат пожари во Франција, Шпанија, Португалија и Грција среде рекорден топлотен бран, за време на кој и Британија се бори со пожарите, каде температурите за прв пат во историјата надминаа 40 степени Целзиусови.
ЕФИС рече дека Европа може да ја заврши 2022 година со повеќе изгорени површини од 2017 година, најлошата година во историјата, кога речиси милион хектари беа уништени од шумски пожари.
„Ситуацијата е многу полоша од очекуваното, иако очекувавме температурни аномалии во нашите долгорочни прогнози“, изјави за АФП Хесус Сан Мигел, координатор на EFFIS.
„Очекуваме да биде уште полошо – не сме ни на половина пат од сезоната на пожари“, нагласи тој.
Речиси 40.000 хектари шума во Франција се изгубени во пожари оваа година, а повеќе од 30.000 изгореле во 2021 година.
Во Шпанија – каде што повеќе од 500 луѓе загинаа за време на 10-дневниот топлотен бран овој месец – оваа година изгореа 190.000 хектари, наспроти 85.000 минатата година.
И со повисоките температури предизвикани од глобалното затоплување, местата помалку навикнати на шумски пожари, особено Британија, исто така беа погодени оваа година.
Во 2022 година изгореа нешто повеќе од 20.000 хектари, во споредба со само 6.000 во цела 2021 година.
„На крајот на краиштата, пожарите се предизвикани од луѓе, но топлотниот бран е опасен и (овие пожари) се јасно поврзани со климатските промени“, рече Сан Мигел.
