Тешко злосторство се случило вчера во подуевското село Перан во Косово. Според медиумите, мажот е осомничен дека го убил својот син.
Според „Репортери“, убиството се случило вчера околу 18 часот, а косовската полиција соопштила дека покренала истрага.
„Околу 18 часот пристигнала дојава за пукање во селото Перан во општина Подуево. Полицијата излегла на местото на настанот и според првите податоци, познато е дека едно лице го загубило животот од огнено оружје. Смрт констатирале лекарите од Брза помош. Полицијата започна истрага за расветлување на сите околности“, се вели во соопштението на полицијата.
Според локалните медиуми, убиството најверојатно било поради имотна корист.
Медиумите пишуваат дека таткото го застрелал синот кој работел со трактор на поле. Како што се наведува, осомничените и жртвата веќе имале пријави во полиција поради претходни проблеми.
