Во германските медиуми во последниве денови се појавија алармантни наслови за состојбата на војската во земјата, што укажува на тоа дека Бундесверот има доволно муниција само за два дена интензивни борби – бројка што очигледно ја открија неименувани извори во одбранбените кругови, пишува Дојче Веле.
Ако ова е вистина, а таквата информација не може да се потврди, бидејќи е државна тајна, германската муниција е многу под стандардите што ги очекува НАТО, што бара секоја членка да има муниција во вредност од 30 дена. Само за да се надополни овој недостаток, експертите за одбрана велат дека Германија треба да инвестира 20 до 30 милијарди евра.
Во изминатите неколку децении, Бундесверот продаде многу од своите бункери за складирање од времето на Студената војна. Тоа значи дека дури и да ја има предвидената од НАТО муниција вредна за 30 дена, војската допрва ќе бара место каде да ја чува.
Постојат и многу други недостатоци. Состојбата на опремата на Бундесверот долго време е тема на загриженост: приказните за тенковите и хеликоптерите на кои им требаше поправка, пушките што не пукаат правилно и војниците кои мораа да тренираат на студ без топла долна облека, со години ги полнат медиумите.
Девет месеци по најавите на канцеларот Олаф Шолц дека ќе одвои 100 милијарди евра за модерна војска, Германците се прашуваат каде се планираните пари.
Партнерите на НАТО во североисточна Европа се загрижени дека Германија нема да биде воен партнер на кој ќе се потпрат. На конференција во Берлин кон крајот на октомври, летонскиот министер за одбрана Артис Пабрикс провокативно ги праша своите европски колеги:
– Ние сме подготвени да умреме, а вие?
Обраќајќи им се конкретно на Германците, тој рече:
– Многу ќе зависи од воената моќ на вашата земја и, извинете но, вашата воена моќ моментално ја нема.
