Наесен ќе биде ставена во употреба специјализирана база на податоци поврзани со недвижното православно културно наследство, која ќе дава препораки за превентивни и заштитни конзерваторски интервенции.
– Специјализираната база на податоци ќе биде достапна онлајн и ќе содржи информации во однос на опфатените православни објекти како: основни податоци за црквата/манастирот, опис, состојба, претходни интервенции на доброто, зачуваност на изворната состојба/автентичност и интегритет и препораки за заштитни интервенции, кои ќе му користат на секој познавач или љубител на православното културно наследство. Истата планирано е да биде ставена во употреба на есен – соопштија од ИКОМОС Македонија.
Во текот на мај, јуни и јули извршен е мониторинг на вкупно 253 православни сакрални објекти (цркви и манастири) во осумте епархии на МПЦ-ОА, што се наоѓаат на територијата на земјава, во рамки на двегодишниот проект „Мониторинг на православното културно наследство“ спроведeн од ИКОМОС Македонија, во соработка со Македонската православна црква – Охридска архиепископија, а со финансиска поддршка од Амбасадата на САД во Скопје.
– Во Скопската и во Повардарската епархија извршен е увид на вкупно 48 православни добра, во Дебарско-кичевската епархија на 71, во Преспанско-пелагониската епархија извршен е увид на 46 православни објекти, во Тетовско-гостиварската и во Кумановско-осоговската епархија на 50, а во Струмичката и во Брегалничката епархија извршен е увид на состојбата на 38 православни објекти – се наведува во соопштението од ИКОМОС Македонија.
Мониторингот го спроведуваат пет стручни тимови од ИКОМОС Македонија во текот на летните месеци, благодарение и на срдечната соработка со надлежните лица од епархиите на МПЦ-ОА и со локалното население во посетените општини.
