Турција во петокот вети дека ќе испрати жито и ѓубрива во најмалку развиените и земјите во развој, особено Африка.
Повикувајќи да се преземат цврсти чекори на претстојниот самит на Г-20 во Индонезија за испраќање жито и вештачко ѓубриво во неразвиените земји, турскиот претседател Реџеп Таип Ердоган рече дека Турција и Русија постигнале консензус за подобра употреба на коридорот за жито во Црното Море, особено за оние земји во Африка на кои им е потребна помош.
Говорејќи на меѓународниот саем организиран од Независните здруженија на индустријалци и бизнисмени (МУСИАД) ЕКСПО во Истанбул, Ердоган рече дека рускиот претседател Владимир Путин се согласил бесплатно да испрати жито во земјите на кои им е потребна.
„За време на нашиот разговор со г-дин Путин, тој рече: „Да испратиме жито бесплатно во земји како Џибути, Сомалија и Судан.“ Бевме на иста страница за тоа. Ќе обезбедиме бродовите со жито да стигнат до секоја земја на која има потреба, почнувајќи од Сомалија, Џибути и Судан, кои се борат со тешка криза со храна и глад“, рече турскиот претседател.
Тој рече дека не го прифаќа менталитетот што ја дефинира Европа како „градина“, а остатокот од светот како „див“.
„Не очекуваме оние кои спроведуваат колонијализам користејќи нови начини и методи да заземат совесен однос кон кризите“, рече Ердоган.
На 22 јули Турција, Обединетите нации, Русија и Украина потпишаа договор во Истанбул за враќање на извозот на жито од Црното Море, кој беше суспендиран по почетокот на руско-украинската војна во февруари.
Во Истанбул беше формиран Заеднички координативен центар со официјални претставници од трите земји и ОН за да ги надгледува пратките.
Русија во саботата објави дека го прекинува учеството во договорот за извоз на жито од украинските пристаништа на Црното Море, а во средата објави дека се враќа на договорот по телефонскиот разговор меѓу Ероган и Путин.
Од потпишувањето на Истанбулскиот договор, од Украина се извезени повеќе од 10 милиони тони жито.
