Еден припадник на затворската полиција од КПУ Идризово е ранет доцна синоќа откако нивното возило било пресретнато и нападнато при транспорт на затвореник назад кон затворот од медицинска установа каде му била укажана лекарска помош.
Според првичните неофицијални информации, возилото на затворската полиција се движело кон затворот Идризово, кога засега непознати лица со друго возило им го пресекле патот, удриле во возилото во кое бил затвореникот и отвориле оган кон припадниците на затворската полиција.
При инцидентот ранет е еден припадник на затворската полиција. Насилниците успеале да го одземат затвореникот, кој според неофицијалните информации е осуден за убиство. Не е јасно дали напаѓачите сакале да го ослободат или да го киднапираат затвореникот, заради одмазда.
Се очекува во текот на денот да бидат објавени официјални информации за настанот.
