Поради претстојната прослава на кинеската Нова година, до крајот на месецот се очекува да се зголеми бројот на случаи на Ковид-19 во Кина, предупредуваат научниците. Тие се особено загрижени за можните епидемии во помалите градови и руралните области, каде што здравствената заштита често е несоодветна, а процентот на постари лица е висок.
„Времетраењето и обемот на претстојната епидемија би можеле драстично да се зголемат поради големото патување за време на Пролетниот фестивал“, напишаа научниците во новата студија објавена во списанието „Frontiers of Medicine“, резимирана од германската новинска агенција dpa.
Додека сегашниот бран на инфекции, кој се очекува да трае до март или април, најверојатно ќе го достигне врвот во метрополите како Шангај и Пекинг, епидемијата ќе стигне до провинциите во централна и западна Кина и руралните области до крајот на месецот, предупредија тие. .
По повод празникот 22 јануари, со кој се означува почетокот на новата година според кинескиот календар, традиционално милиони луѓе патуваат да ги посетат роднините во подалечните места низ земјата.
Експертите се особено загрижени за можните епидемии на болеста во помалите градови и руралните области, каде што здравствената заштита често е несоодветна, а голем дел од населението се постари.
На почетокот на декември, Кина ја укина политиката на нулта толеранција за Ковид-19, што беше проследено со скок на инфекции. Како резултат на тоа, земјата се соочува со недостиг од лекови и болнички капацитети.
Според проценките, околу 248 милиони луѓе, или 18 отсто од сите Кинези, биле заразени со вирусот само во првите три недели од декември, според ДПА.
Во последните денови, се повеќе земји воведуваат задолжително тестирање или други услови за патниците кои доаѓаат од Кина. Меѓу нив се Шпанија, Велика Британија, Италија и Франција. Во меѓувреме, Брисел повика на координиран одговор на ниво на ЕУ, а шведското претседателство со Советот на ЕУ потоа свика состанок на оваа тема за денеска. Пекинг е критичен кон активностите на одделни земји и се закани дека ќе преземе одмазднички мерки.
