САД соопштија дека ја укинале забраната за обука и снабдување со американско оружје за контроверзната украинска воена единица Азов, која Москва ја опишува како неонацистичка.
Американскиот закон забранува обезбедување опрема и обука на странски воени единици или поединци осомничени за сериозни прекршувања на човековите права, а Стејт департментот во денешното соопштение наведе дека не нашол „нема докази“ дека се случиле такви прекршувања.
Азовската бригада, која за време на руската инвазија одигра важна улога во одбраната на водечкиот пристанишен град Маријупол, е една од најефективните и најпопуларните единици во Украина. Сепак, често е на удар, и поради тоа што првично привлекуваше доброволци од крајно десничарските кругови, и поради некои од тактиките што се користат.
Одлуката за забрана на единицата Азов да користи американско оружје беше објаснета од САД со неонацистичката идеологија на некои од нејзините основачи.
Припадниците на единицата Азов, која стана дел од Украинската национална гарда како 12-та бригада на специјалните сили, ги отфрлаат обвинувањата за екстремизам и негираат каква било поврзаност со екстремно десничарските движења.
И покрај тоа, Кремљ го искористи потеклото на бригадата за да ја претстави инвазијата на Русија како битка против нацистичкото влијание во Украина.
Портпаролот на Кремљ Дмитриј Песков денеска изјави дека Москва зазема „крајно негативен“ став за одлуката на Вашингтон, го опиша Азов како „ултранационалистичка вооружена формација“ и ги обвини американските власти дека се „подготвени да флертуваат со неонацистите“.
До денешната одлука на Стејт департментот, на Азов му беше забрането да испраќа борци на западни воени вежби и да користи оружје купено со американски средства.
Укинувањето на забраната веројатно ќе го зајакне борбениот капацитет на Азовската бригада во тешко време за Украина, на која и недостасуваат и муниција и борци во војната против руските сили.
Борците на Азов одиграа клучна улога во одбраната на Маријупољ, кога, опколени во челичарницата Азовстаљ, со недели се спротивставија на жестоките напади на руските сили и покрај малата количина муниција.
Во Украина се слават како херои и се паметат по одбраната на таа фабрика за челик, која стана симбол на украинската упорност во војната против Русија.
