Муслиманите ширум светот денеска го слават Денот на Ашура, кој се карактеризира со истоименото слатко јадење, а е симбол на бериќет, заедништво и споделување добра меѓу луѓето.
Денот на Ашура се слави на десеттиот ден од Мухарем, првиот месец од хиџри, или исламскиот календар, а за муслиманите има силно религиозно, историско и културно значење.
Ашура на арапски значи десет, а токму 10-ти Мухарем е исклучително значаен во историјата на исламот и пророците. На тој ден, според хадиси и други извори, се случиле голем број важни настани, вклучувајќи го спасувањето на ковчегот на пророкот Ное и минувањето на пророкот Муса низ разделеното море за да се спаси од фараонот.
Според многу дела од културната историја, на овој ден било прифатено покајанието на пророкот Адам, се случило и вознесението на пророкот Идриз, огнот не сакал да го запали и изгори пророкот Ибрахим, пророкот Јакуб повторно се сретнал со својот син и пророкот Јусуф, пророкот Ејуб оздравел, пророкот Јунус бил спасен од утробата на риба, а пророкот Иса е роден и израснат по Божја волја.
На денешен ден, во 61-та година од Хиџри, во Кербала беше убиен внукот на пророкот Мухамед Хусеин заедно со уште 72 негови блиски луѓе.
Поради овие и многу други важни настани, муслиманите му придаваат големо значење на Денот на Ашура, кој се карактеризира со истоименото слатко јадење кое се прави од повеќе видови овошје, јаткасти плодови, житарки и друга храна.
Таквото јадење се подготвува во спомен на пророкот Ное, чија арка слета на копно по потопот на овој ден со, според легендите, пар од сите живи видови на Земјата.
Со оглед на тоа што хиџрискиот календар се разликува од грегоријанскиот календар, десеттиот Мухарем се случува на различен ден секоја година според Грегоријанскиот календар. Затоа, храната од која се подготвува Ашура варира секоја година, во зависност од сезоната и достапноста на овошјето.
Едно јадење може да содржи од 7 до 77 состојки, а вообичаено е да се дели со соседите и роднините.
