Гувернерот на окупираниот Херсон во јужна Украина, назначен од Русија, изјави дека регионот наскоро целосно ќе се интегрира во Русија, јави Би-би-си.
Володимир Салдо, назначен од руските сили откако ја презедоа контролата на областа на почетокот од месец март, напиша на Телеграм дека Херсон ќе стане „регионот Херсон на Руската Федерација“.
Неговиот заменик, Кирил Стремоушов напиша оти жителите ќе можат да аплицираат за руско државјанство наредните недели, кога ситуацијата ќе се стабилизира.
Украински официјални лица неколкупати предупредија дека Москва планира лажен референдум за независност во регионот, како и на други места.
Портпаролот на Кремљ, Дмитриј Песков, претходно месецов изјави дека иднината на регионот зависи од волјата на жителите.
