Турскиот претседател Реџеп Таип Ердоган, говорејќи на Вториот самит на Кримската платформа во онлајн формат, рече дека заштитата на територијалниот интегритет, суверенитет и политичкото единство на Украина е од клучно значење не само за регионалната, туку и за глобалната безбедност.
Ердоган заклучи дека враќањето на Крим на Украина, чиј нераскинлив дел е, е најважната потреба од гледна точка на меѓународното право, и затоа директно му противречи на својот сојузник и партнер, рускиот претседател Владимир Путин, кој има сосема поинаков став.
Претседателот на Турција најави и нова антитерористичка операција во северна Сирија. Очигледно целта е да се формира „безбедносна зона“ во оваа земја, долга 30 километри, од границата со Турција до внатрешноста.
На Вториот самит на Кримската платформа зборуваше и генералниот секретар на НАТО, Јенс Столтенберг, кој рече дека Северноатлантската алијанса ќе стои на страна на Украина „се додека е потребно“.
Столтенберг предупреди дека Украина и нејзините партнери мора да се подготват за тешка зима и исцрпувачка војна.
„Ова е битка на волјата и битка на логистика“, истакна Столтенберг, уверувајќи го Киев дека „НАТО ќе остане со Украина се додека е потребно“.
„Силна, стабилна и независна Украина е од големо значење за евроатлантската безбедност“, рече Столтенберг.
Тој ја пофали Украина за нејзината „неверојатна способност да се спротивстави на бруталната агресија, да возврати, да зазема територии и да и наметне големи трошоци на Русија“ во последните шест месеци од војната.
