„Канада мора да ја исполни минимум целта на НАТО за одбранбена потрошувачка и да претстави план за нејзино постигнување, покажувајќи им на авторитарните режими дека западните сојузници се усогласени“, смета генералниот секретар на НАТО, Јенс Столтенберг.
Генералниот секретар на НАТО, Јенс Столтенберг во средата, за време на посетата на Отава, ја повика Канада да ги зголеми трошоците за одбрана, бидејќи се уште не ја достигнала целта од два отсто од БДП, пренесоа канадските медиуми.
Канадскиот министер за одбрана Бил Блер вети дека Канада постепено ќе троши повеќе за одбраната.
„Канада мора да ја исполни минимум целта на НАТО за одбранбена потрошувачка и да претстави план за нејзино постигнување, покажувајќи им на авторитарните режими дека западните сојузници се усогласени“, рече Столтенберг.
„Позицијата на Канада во НАТО е силна, но во исто време, се разбира, очекуваме сите сојузници да го исполнат своето ветување за два проценти инвестиции“, рече тој на настанот организиран од Канадската асоцијација за НАТО во Отава.
На истиот настан, канадскиот министер за одбрана Бил Блер вети дека целта на крајот ќе биде постигната, бидејќи руската војна во Украина го зголемува ризикот од ширење на конфликтот во Европа. Тој предвиде дека трошоците за одбрана на Канада ќе се зголемат на најмалку 1,75 отсто од БДП до 2029 година. Дополнителните трошоци за нова подморничка флота и интегрирани воздушни одбранбени и ракетни системи најверојатно ќе надминат два отсто, рече тој.
Се очекува Канада оваа година да потроши 1,37 отсто од својот БДП за одбрана, пишува весникот „Глоуб и мејл“.
Столтенберг, исто така, изрази загриженост за поддршката на Русија за севернокорејската нуклеарна и ракетна програма и поддршката на Кина за руската воена економија преку обезбедување на електроника што се користи во оружјето и борбите против Украина.
„Значи, одговорот е дека кога сите авторитарни режими како Северна Кореја, Кина, Иран и Русија се повеќе и повеќе поврзани, тогаш е уште поважно што сме поврзани како земји кои веруваат во слобода и демократија“, рече тој. .
Трошоците за одбрана беа исто така една од темите на последователниот разговор на Столтенберг со канадскиот премиер Џастин Трудо.
Столтенберг во понеделникот во Белата куќа рече дека очекува сојузниците да се договорат на самитот во Вашингтон во јули да ја зголемат финансиската и воената поддршка за Украина и да го намалат товарот на САД.
