Американскиот претседател Џо Бајден за време на вчерашниот говор во Белата куќа предупреди дека откажувањето на финансиската помош за Украина може да доведе до криза во балканските земји.
„Ако ние заминеме и Русија го издржи нивниот напад и ја порази Украина, што мислите дека ќе се случи во балканските земји? Што мислите дека ќе се случи од Полска до Унгарија? – праша Бајден.
„Русија би можела да ја добие војната за неколку недели“
Врвните помошници на Бајден отворено им кажаа на пратениците на приватна средба во средата дека ако Конгресот наскоро не одобри дополнителна воена помош за Украина, Русија би можела да ја добие војната во најдобар случај за неколку недели или месеци, пишува NBC News.
Советникот за национална безбедност Џејк Саливан и директорот на националното разузнавање Аврил Хејнс тогаш изјавија дека не е случајно што Владимир Путин го изврши најголемиот воздушен напад од почетокот на инвазијата на Украина, откако Конгресот не одобри поголема помош минатиот месец.
Саливан нагласи дека позицијата на Украина ќе станува се потешка во текот на годината.
Воена помош за Украина
Украинскиот претседател Володимир Зеленски и Бајден го повикуваат Конгресот да одобри нов пакет помош од 61,4 милијарди долари, но републиканците одбиваат да ја одобрат помошта без договор со демократите за зајакнување на безбедноста долж границата меѓу САД и Мексико. Но, дури и републиканците да попуштат и да се согласат да ја продолжат помошта, таа веројатно би била значително помала.
Без дополнителна американска помош, проценуваат западните власти, Украина прво би останала без ракети со долг дострел, потоа ракети за противвоздушна одбрана, а подоцна и артилериска муниција и ракети со краток дострел, како што се противтенковски ракети Javelin и противвоздушни ракети Стингер
