Во Монако и Франција разбиена криминална група со потекло од Балканот. Групата беше уништена по темелна полициска истрага, а 19 лица беа уапсени под сомнение за криминални активности како што се трговија со дрога и оружје и перење пари преку компании-школки.
Тринаесет лица се уапсени во Франција и уште шест во Монако како дел од голема полициска операција. Истрагата ја спроведе Националната служба за борба против организиран криминал.
При претресот полицијата запленила два пиштола, нешто повеќе од 19.000 евра во готовина, часовници, луксузни предмети и блиндирано „ауди А8“.
Криминалците „паднаа“ благодарение на апликацијата Sky ECC. Тие размениле пораки во периодот од февруари 2020 година до февруари 2021 година, а врз основа на тие пораки бил идентификуван водачот на групата, кој има српско потекло.
Француските медиуми пишуваат дека водач на мафијата е Србинот Б.В., познат по прекарот Брацо. Во Франција тој наводно е познат како моќен претприемач и сопственик на голем број на многу луксузни имоти, како и на агенција за недвижности.
„Ова е Б.В., ака Брацо, кој живее во Франција од 2000 година. Со текот на годините, тој успеа да изгради мала империја на недвижнини на Азурниот брег – вклучувајќи земјиште, станови и луксузни вили. Исто така, има десет компании за недвижнини“, пишува Le Parisien, пренесува Index.rs.
11 од нив, вклучително и неодамна пензиониран полицаец кој работел за правосудната полиција на Монако, беа изведени пред истражен судија.
На деветмина осомничени им е одреден притвор. Le Parisien пишува дека оваа банда, чии членови се и државјани на Србија, се занимавала и со трговија со оружје. Француските медиуми пишуваат дека меѓу другото продавале митралези и пушки.
