Шпанската метеоролошка служба предупреди дека земјата може да биде погодена од разорни урагани ова лето.Зголемувањето на температурата на морето потенцијално може да доведе до создавање на разорни урагани во Атлантскиот Океан, со сериозни последици за Шпанија, пренесува Euro Weekly News.
Сезоната на урагани во Шпанија трае од 1 јуни до 30 ноември секоја година, а метеоролозите предупредуваат дека временските услови во наредните недели се поволни за развој на разорни урагани.
Иако Шпанија историски не доживувала често урагани, порастот на температурата на морето во последните години го зголемува ризикот од вакви метеоролошки феномени. Традиционално, географската локација на Пиринејскиот Полуостров обезбедуваше одредена заштита од урагани, со пониски температури на морето во споредба со тропските области. Сувите ветрови од Сахара дополнително ја намалија влажноста на околината, намалувајќи ги шансите за формирање на урагани.
Сепак, неодамнешниот пораст на температурата на морето е причина за загриженост. Европската служба за климатски промени Коперник (C3S) објави температура на морето од 28,4 степени Целзиусови на 24 јули, што дополнително предупредува за можно зголемување на ризикот од урагани.
Метеоролозите предупредуваат дека во иднина во Шпанија би можеле да зачестат екстремните урагани, топлотните бранови, бурите и обилните дождови, нагласувајќи ја потребата од зголемена подготвеност и јавна свест за намалување на потенцијалните последици од овие природни катастрофи.
