Вкупно 3.555 ваучери во износ од 18.000 денари за одмор на работници со ниски примања ќе подели Министерството за економија годинава. Во понеделник ќе биде објавен јавен повик.
– Главната цел за оваа мерка е да им се овозможи на работниците со ниски примања да одат на одмор во зеМјава, а туристичките капацитети да остварат дополнителен приход – рече министерот Крешник Бектеши на денешната прес-конференција.
За реализација на оваа мерка обезбедени се околу 1 милион евра.
Основен критериум е семејството на работникот кој ќе аплицира за ваучер да нема нето-приход повисок од 50.000 денари.
Потврдата ќе може да се користи во период надвор од сезоната, од моментот на добивање до 30 јуни и од 15 септември до 1 декември годинава. Изборот на објектот во кој ќе се користи ваучерот се прави од посебен список на туристички и хотелски капацитети објавен од Министерството за економија.
