Вашингтон смета дека е малку веројатно Израел да успее да постигне целосна победа во војната во Појасот Газа,објави Ројтерс повикувајќи се на изјавата на висок американски функционер во администрацијата на претседателот Џо Бајден.
Агенцијата го цитира и портпаролот на израелската армија Питер Ленер, кој вели дека убиството на секој член на движењето Хамас е нереална цел и дека армијата не сака да ја постигне.
– Сепак, уништувањето на Хамас како владејачка сила може да се постигне, а тоа е остварлива воена цел – додава Ленер.
Американскиот заменик државен секретар Курт Кембел кон крајот на минатиот месец откри дека администрацијата на претседателот Џо Бајден не верува дека Израел ќе постигне „тотална победа“ над движењето Хамас во Појасот Газа.
– На некој начин ни е тешко да дефинираме што е теоријата на победата. Понекогаш, кога внимателно ги слушаме израелските лидери, тие најчесто зборуваат за идејата за голема победа на бојното поле, тотална победа. Мислам дека не го гледаме ова како веројатна или можна опција. Ова е многу слично на ситуациите во кои се најдовме по 11 септември – рече Кембел за време на младинскиот самит на НАТО во Мајами
Си-Ен-Ен ја цитираше изјавата на американскиот заменик државен секретар: „Ние се бориме со Израел за природата на победата во Газа. Не веруваме дека целосната победа што Израел сака да ја постигне е веројатна или можна“.
Коментарот се смета за прво вистинско американско признание дека сегашната воена стратегија на Израел нема да ја постигне својата цел.
Во истиот контекст, израелскиот весник „Тајмс оф Израел“ цитира американски функционер кој вели дека процесот на маргинализирање на Хамас ќе трае со години.
Американски функционер рече дека Хамас ќе остане во некоја форма во Газа и по завршувањето на војната и дека целта на Вашингтон е да ја ограничи способноста на палестинската милитантна организација да изврши напад сличен на оној на 7 октомври 2023 година.
Израелскиот премиер Бенјамин Нетанјаху повеќепати вети дека ќе постигне „тотална победа“ над Хамас откако движењето ги нападна израелските бази и населби на 7 октомври минатата година. Во нападот, според израелските податоци, загинале 1.200 војници и доселеници, а 250 луѓе биле заробени.
После тоа, Израел започна агресија врз Појасот Газа, која сѐ уште трае. Во израелските напади настрадаа повеќе од 35.000 Палестинци, од кои повеќето се жени и деца.
