Украинската термоцентрала вечерва е оштетена во голем руски напад, последниот насочен кон украинските енергетски инсталации, објави приватниот оператор на електраната ДТЕК.
„Уште една тешка ноќ за украинската енергетска индустрија, Русите ја нападнаа термоцентралата на ДТЕК“, соопшти денеска компанијата, посочувајќи дека е направена „сериозна штета“ и дека тројца вработени се повредени.
Според компанијата, ова е седми „масовен“ напад врз украинските електрани во последните три месеци.
Во последниве месеци, Москва започна кампања со напади насочени кон главните центри за производство и дистрибуција на електрична енергија во Украина и уништи, според претседателот Володимир Зеленски, половина од енергетскиот капацитет на земјата.
Киев ги повика западните сојузници да и помогнат да ја обнови својата електрична мрежа, проект кој бара поголеми инвестиции, и да и обезбедат на Украина повеќе воздушна одбрана за да се спротивстави на нападите на Москва.
Националниот оператор Укренерго утринава соопшти дека во текот на ноќта бил извршен „масовен напад“ врз објекти на енергетската инфраструктура.
„Оштетени се инсталациите лоцирани во регионите Виница, Дњепропетровск, Доњецк и Киев“, објави Укренерго, додавајќи дека се проценува обемот на штетата.
Воздухопловните сили на Украина соопштија дека Русија истрелала девет проектили и 27 беспилотни летала од иранско производство, додавајќи дека сите проектили освен четири биле соборени.
„Нападната е важна инфраструктурна опрема“, соопшти украинското воздухопловство. Според нив, главна цел на нападот бил источниот дел на Украина и особено регионот Дњепропетровск, каде се наоѓа едно од централата на компанијата ДТЕК.
Системите за противвоздушна одбрана беа активирани особено во регионите Запорожје, Доњецк, Керсон, Харков и Киев, се додава.
